منتديات شط العرب

أهلاً وسهلاً بك بمنتديات شط العرب

انت الان زائر يرجا منك تعريف نفسك وتسجيل معنا

اسره منتديات شط العرب
منتديات شط العرب

منتدى عربي عام ترفيهي تجد كل جديد وممتع ومفيد معنا هنا

 لوحة شرف المنتدى لهذا الأسبوع 

 
قريبا
قريبا
قريبا
قريبا

    مجموعة شعريه ........ ولا أروع .....

    شاطر
    avatar
    حيدر المجراوي
    مدير المنتدى
    مدير المنتدى

    عدد المساهمات : 636
    نقاط : 1892
    تاريخ التسجيل : 19/10/2010
    العمر : 27
    الموقع الموقع : http://hyder.a7larab.net

    مجموعة شعريه ........ ولا أروع .....

    مُساهمة من طرف حيدر المجراوي في الجمعة أكتوبر 29, 2010 5:59 pm

    القاتل المأجور

    چنت سامع گبل بالقاتل الماجور
    من الشمات ياخذ على الدم اتعاب
    وانه ممنون منك جسدتلياه
    گل للكلفوك الرايدينة انصاب
    گالولك تلوحة وگلت طگة موت
    ومن تلوح شاطر بالف طگة حساب
    جبت بيدك ورد لمعة الخنجر بي
    وانه مصدگ بشوفي وگلت لا چذاب
    گتلك ذاك خنجر گلت خنجر وين ؟
    حتى تخلني اامن طلعتلي گراب
    متت مامشتكي وعرفت اسراري الناس
    شامت گايللهم كاتلينة احباب
    انه عشت بجرح بس من زمان وياي
    من يلچم بيدي يطيح منه تراب
    من قرالك قصيدة الندة دموع ايصير
    وتون النوارس حدر جدمي اسراب
    من دچيتني چنت ارد ابوسك جاي
    يعني من التقينا چان عدنه اسباب
    اجيتك والگمر مستحي ايشوف الشوگ
    بس لمن صبتني ماتحمل غاب
    انه بانيك چن قلعة ملك شبساع
    هبت بيك ريح وصرت تل تراب
    بست خدي وخفت بس گلت لا حلمان
    اثر بوسة شفافك چان طبع انياب
    لا تحسب ابياتي عتاب عود وياك
    بس ويالعزاز ايصير عندي عتاب
    انه بطلت اون بس الجرح بي نار
    صح طفيته لكن ظال بي عطاب
    من الفه ضماد بس حسبة ثواني ايطيح
    لان مجنون جرحي وماتلمة ثياب
    وانه ضميتهن دمعه وجرح مجنون
    وتوالمن بيه وعايشات احباب
    احلف عيوني منك كون دمعي يتوب
    وانه شكي بمحلة ومامصدگ تاب
    تهجم ذكرياتك وانه ابوابي هواي
    اركض باب اسدة وغاد يوگع باب
    انه ياباب افك حتى من اروح انساك
    اهن لو گبر بيهن لو وراه سرداب



    حلوه بمعنى حلوه


    حلوة بمعنى حلوة ومامبالغ بيج
    ابحسنج دورو بس مالكو خلة
    محلية المدرسة وتشهد الرحلة بهاي
    حطيتي برحلتج ميت الف عله
    دورة موصفج الي الطب مو كت وكتين
    بالسبعة الدوام وبثنعش حلة
    ماغير وقت توقيت شتوي وصيف
    توقيتي من اشوفج ينكلب كلة
    السبعة ونص وقت تعطش الشمس البي
    ويجف ريجهه وبشوفج اتبله
    وخصرج سيف حاد عيون ماتت بي
    يدرن بي منية ورضن يمشله
    لذلك حتى اموت اعترض دربج دوم
    غير العندة سيف بشدته ايله ؟؟
    يااحث زليخه الماتقد الثوب
    واجمل من زليخة الصممج جله
    يوم المااشوج بي احسة يروح
    مومن عمري اكول وفدوة الج وله
    يالتوصل وزير التربية اترجاه
    خليلغي العطل وبقصتي اتكله
    اذا تستمر عطله ابين يوم ويوم
    يعني الخل بعد مايلتقي بخله

    ماردت احبك حــــــاولت

    ماردت احبك حــــــاولت
    من لفظة اسمك حاذرت
    جلمه وشلتهه من الحجي
    من اللسان اخفيــــــــتهه
    و بيبان روحي مقــــفله
    وعن لا احب سديتـــــهه
    صلفه امنــــياتي الرادتك
    سئلتني عنك بس صمت ؟؟
    كلـــــــــــش ولاحاجيتهه
    كالتلي وينه ؟؟وجــاوبت
    مادري مادليتـــــــــــــهه
    ماردت احس حبـــك لان
    كبلك الروح انطيــــــتهه
    ولخاطرك رحت اعــــتذر
    منيت بيهه لخاطـــــــرك
    مثل الطفل ..لمن يمن بحاجته
    وياك اعزناسي انتهه ...
    وماكمت احس بعازته
    أبدربي كلت لو مو سوه ..
    امشي حياة بلادرب
    يمكن يشح عني الهوه ؟
    لابس جذب...
    معقولة مانمشي سوه ؟؟
    معقولة في لحظة الشمس
    للكاع ماتتنطي ضوه ؟؟؟
    وتنتهي ومانلكه صبح ؟
    معقوله يطلعلي جرح ؟؟؟
    معقوله ؟؟
    ريشة شفتك ؟؟
    ترسملي بالضحكة رمح ؟؟
    لا ...موصدك
    خلينا من هذا الحجي...
    بجفوني سولة عللبجي
    وصيادة كاعد بالجفن للدمع شايل فالته
    وياي احسك جن صرت مثل الهلال وهالته
    كالولك يعوفك تره ؟؟
    تذكر كبل ؟؟
    كتلي شكلهم ؟؟
    كتلك أي.....كلهم لمن من يمي تمشي جنازته
    هوانه عايشلك لان ؟
    دمي الاعز مابالجسد بس انته تعرف حالته
    من مايحس بلمستك
    يخلص وتبقى وشالته
    تذكر جنت
    من تعتنيلي بدمعتك مشتاك حتى تشوفني ؟؟
    وتلكاني روح مشككه ولمسات اديك تروفني
    تتركني هسه قررت ؟
    ينطيك كلبك ننتهي وبس بالاحلام تشوفني
    تتركني هيج بلاذنب ؟
    بررلي حتى لوجذب
    مليت كلي كمت امل
    شيحمله ليلي بوحدتي
    عندك عذر ..
    مليت كلي .....كمت امل
    شيحمله ليلي بوحدتي
    ماينحمل عدك تره
    وجذبت كتلك ينحمل
    كتلك لمن تمشي تره تتركني وحدي جن طفل
    تايه ..
    وكل اهله مشو ..
    عايش ايتاني الماأجو...
    كلشي اليمر يفززه ...
    حتى الشماته اتفززه..
    من يمشي ويهب الهوه
    يلتفت حسباله حجو
    لكن لمن يتذكرك
    حتى الشماته ..
    المابجو..
    من شافو دموعه بجو
    هيج آنه من عني رحت
    ماتسكت جروحي ولودورتك انه بشدتي
    شفتك وطن حنيت الك
    لكن لكيتك غربتي
    احتاريت منهن ياهي اصح
    مابين ذلي وعزتي
    اختاريت اعوفك حتى لا
    تكسر قرار دمعتي
    او ونيت سكته ماردت
    يشمتون بونتي
    صح اضحك بنبرة فرح
    بس ركز بصوتي بعد
    تسمع نحيب بضحكتي
    هم مثلي كلبك مانسه
    وهو بعد من تمشي درب
    تذكرني خطواتك بعد ؟
    تترك فراغ لخطوتي ؟
    لاتسكت ال لا بينت
    بين اثرهه بعبرتي
    ولاتلتفتلي بس ردت
    انطيك اخر مابقى وهوشبقى ؟
    مني خذت كلش وبقت
    دمعات ليك بذمتي

    بلياك ماعيش

    بلياك ماعيش اليكلك عشت
    بعيوني احلفك منة تاخذ حذر
    انة اطمئن يمك واذا تبتعد !
    من كلشي يمي انة احس بخطر
    الليل يدري شكد احبك لأن
    وياك عيني تستلذ بالسهر
    اذبل لحد ما ارتوي بشوفتك
    جن سنبلة الروح وعشرتك نهر
    بلياك كشي يصير مابيه طعم
    ماميز ابين الورد والصخر
    تمطر ترافة وانة اخضر غزل
    وبكاع جفي قلمي يطرح ثمر
    لو راد ياخذني القدر كلي الك
    بس لابيني وبينك يمر قدر
    علمت روحي من زغر شوفتك
    ردتك صدق تبقى نقش ع الحجر
    تشتاقلك عيني اذا سافرت
    مثل النوارس من تحن للبحر
    انه شسوي بالنظر لو رحت
    من تمشي كلي حتى اضمة النظر
    مادور بحبك خسارة وربح
    مافكر بقلبي ربح لو خسر
    كل اليهمني انة احبك فقط
    حب لونة صافي ابيض من الكمر
    طير انتة من مر بسمى دنيتي
    وكر على روحي وعليها استقر
    يسكت غصن خلقي كبل لاتجي
    ينتظرك الريح التحرك الشجر
    بلياك قلبي يصير مابيه نفع
    شيفيد كلي الغيم البلامطر
    عين الاشوفك بيها احس تختلف
    مونفس عيني البيها اشوف البشر
    مرات احجي صورتك ع الورق
    من اخلط احساسي وي لون الصور
    امشي بحياتي وامعن بخطوتك
    حتى من اتيهك ع الاقل الكة اثر
    انة من اعوفك جدمي يمشي بثقل
    ثقل الجدام المالة من السفر
    ومن تمشي عني اكون احس يختنك
    والعالم بكبرة احس بيه زغر
    بس لمن تردلي ارد اكتشف
    كلشي بمكانه وانتة حبك كبر

    أمــــــــي

    اسم امي امان علليخافون
    ونقاطه اتصير بالظلمه قناديل
    انه امي الكاع هاي الربت رجال
    بيهم خورست حلك المقابيل
    وقوره وخيره ومن اهل الله ينكال
    ام كول وفعل موبس اقاويل
    كرامتهه نخلهه وحيله جبال
    وصبوره ولو تثور اترد اساطيل
    ام جلمه العدله الماتزل يوم
    وذهب كل حرف من تحجيه مثاقيل
    وحظنهه تراب صح بس لفظا تراب
    اذا هزت حظنهه اتذب تماثيل
    واذالولت ولد يبني دلول
    نخلهه يطش شعرشعبي ومواويل
    وذا عاشور مرهه دموعهه اتطيح
    مواكب تلطم بقامه وزناجيل
    امس السافر من اولادهه وراح
    تمر لهناك ودتله مراسيل
    امي مشيله من زاخو للفاو
    وطرف شيلتهه يوصل للمحاويل
    كد مالبست اسود دمهه محروك
    واذا تنزف جرح تنزف براميل
    انه ارض العراق اسم امي للزين
    بس علشين تتحول عراقيل




    بغداد

    كبرت بالمساحه هوايه بغداد
    حتى ويالمدن ماتبقى فجوه
    كبرت وانتجه علجتافهه الطاح
    عكس اليكبر وتنحطلة تجوه
    جانت حلوه بس لاهسه موهيج
    لا بل هسه يمكن احلى حلوه
    احير ابينهه وبين الورد دوم
    ردت شكد اميز دون جدوه
    اهي مزروعه بي ؟لو هو مزروع ؟
    كلاهم من تجي من دجله يروه
    ولو باك القدر ضحكتهه بس لا
    من جف القدر خذناهه عنوه
    زلم طاحت وكلنه فدوه اليطيح
    كنه الموت حق والدنيه نزوه
    كالو زين اذ تتهاوه بغداد؟
    كلنه شلون ؟افه !ماكلنه فدوه
    هده بيهه الوضع مو بالنفط كون
    اضافه لعاصمه نسميهه ثروه
    خلتحجي الخوذ من زعلت اشصار
    اخذنه الحك تره ماخذنه عطوه
    صح مانختلف محتاجه الاعمار
    بس الالف خطوه تبدي خطوه
    لتكلي اليعمر الا بي حيل
    شسوي بحيله اذا ماعنده نخوه
    اكو سبعين عمره ويفزع وياك
    واكو عشرين بس تفزعه كوه
    بعد حتى الشعرمانقبل يكون
    اذا يوصف مشاهد بيهه قسوه
    انا بعازة قصيدة تعمرالطاح
    مامحتاجك تسمعني عبوه
    صح بيه جرح بس رايد انساه
    كدرت اتجاهله وخيطنه توه
    ماخيطته هيج براحت البال
    لا غصبن عليه خيطته كوه
    جرح تحيي من تشوفه الشواجير
    بس يموت اذا سمعته غنوه
    غنوه وكون غنوه بيهه بغداد
    وكون الشاعر ايغنيهه هوه
    لان الشاعر ايغنيهه بحساس
    وبالحساس القصيدة تطلع اقوه




    تحياتي وحبي وأحترامي وأتمنى تعجبكم




    بين الحزن والالم تاهت عناويني لا ظلي أنا من محب أفديه ويفديني
    يهواي ماعاشرت والله غيرك بشر وياك أحس قدمت كل عمري وسنيني
    وأنطيتك أنه كلب يهواك طول العمر
    وبهجرك تجازيني ؟؟؟

      الوقت/التاريخ الآن هو الإثنين يونيو 26, 2017 3:08 pm